Fevralın 19-da Sankt-Peterburqda, Mariya Teatrında “Məhəbbət əfsanəsi” tamaşası nümayiş olunub. Tamaşa əsərin müəllifi, dünya şöhrətli Azərbaycan bəstəkarı, SSRİ Xalq artisti Arif Məlikova həsr edilib.
Axin.az xəbər verir ki, Azərbaycanın Sankt-Peterburqdakı baş konsulluğundan bildiriblər ki, baş rolda Mariya Teatrının balet truppasının premyeri, Azərbaycanın Əməkdar artisti Timur Əsgərov çıxış edib. Azərbaycanın Sankt-Peterburqdakı baş konsulu Sultan Qasımov və vitse-konsul Rüfət Dadaşov tamaşanın nümayişində fəxri qonaq qismində iştirak ediblər.
Tamaşa başa çatdıqdan sonra Azərbaycanın Əməkdar artisti Timur Əsgərova gül təqdim edən baş konsul Sultan Qasımov səhnə arxasında artistlərlə görüşüb səmimi söhbət edib, onları gözəl çıxışları münasibətilə təbrik edərək balet truppasına bundan sonra da yaradıcılıq uğurları arzulayıb.