İki həftə əvvəl Nəsimi rayonu Həsən Əliyev küçəsində vətəndaş Natiq Həsənova məxsus fərdi yaşayış evinin qanunsuz olaraq sökülməsi barədə məlumat vermişdik. Ev sahibi bildirmişdi ki, məhkəmə qərarı və ekspertiza rəyi olmasına baxmayaraq, Nəsimi Rayon Məhkəməsinin icraçıları onları zorla evdən çıxarıblar.
Natiq Həsənov bu gün “Qafqazinfo”ya bildirib ki, məsələ ictimailəşdikdən sonra icraçılar işlərini dayandırıblar. Bundan sonra isə öz hesabına yenidən evini təmir edib.
Vətəndaşın sözlərinə görə, polis əməkdaşlarının köməkliyi nəticəsində təmir işlərinə maneə yaradılmayıb. Bu gün isə icra məmurlarının hərəkətlərinə görə, Ədliyyə Nazirliyində qəbulda olub: “Nazirlik katibliyinin yeni rəisi Əbülfət Həsənovun qəbulunda oldum. Başımıza gətirilənlər barədə geniş məlumat verdim. Bu işin arxasında məmur dayandığını da dedim. Rəis dedi ki, heç bir məmur qanunsuz olaraq kiminsə evini sökə bilməz. Söz verdi ki, məsələni araşdıracaq, nəticəsindən asılı olaraq problemimizin həllinə çalışacaq”.