Səhiyyə Sistemi" İşçi Qrupunun Növbəti İclası Keçirilib
Dekabrın 11-də Səhiyyə Nazirliyinin rəhbərlik etdiyi və Biznes mühiti və beynəlxalq reytinqlər üzrə Komissiyanın tərkibində fəaliyyət göstərən “Səhiyyə sistemi” işçi qrupunun növbəti görüşü baş tutub.
Axın.az xəbər verir ki, görüşdə bir sıra dövlət qurumlarının nümayəndələri iştirak ediblər. Tədbirə Azərbaycan Respublikası Prezident Administrasiyası, Səhiyyə Nazirliyi, İcbari Sığorta üzrə Dövlət Agentliyi, İqtisadiyyat Nazirliyi, Əmək və Əhalinin Sosial Müdafiə Nazirliyi, Elm və Təhsil Nazirliyi, Dövlət Statistika Komitəsi, Ailə, Qadın və Uşaq Problemləri üzrə Dövlət Komitəsi, İqtisadi İslahatların Təhlili və Kommunikasiyası Mərkəzi (İİTKM), Azərbaycan Qida Təhlükəsizliyi Agentliyi və Tibbi Ərazi Bölmələrinin İdarəetmə Birliyi (TƏBİB) kimi qurumların təmsilçiləri qatılıb. Bundan əlavə, Səhiyyə Nazirliyi İctimai Səhiyyə və İslahatlar Mərkəzinin nümayəndələri və işçi qrupun məsul şəxsləri də iclasda iştirak ediblər.
İclas Səhiyyə nazirinin müavini Rasim İsmayılovun rəhbərliyi ilə keçirilib. Görüşdə bir neçə əsas məsələ müzakirə olunub. Əvvəlcə işçi qrupun yeni üzvləri təqdim edilib. Daha sonra, “Səhiyyə sistemi” üzrə hazırlanan Fəaliyyət Planının icrası zamanı həyata keçirilən işlər təhlil olunub. Nəhayət, əvvəlki iclasın nəticələri və həmin görüşdə qəbul edilmiş qərarların icra vəziyyəti ətrafında geniş müzakirələr aparılıb.
Bu iclasın əsas məqsədi “Səhiyyə sistemi” işçi qrupunun fəaliyyətini daha effektiv təşkil etmək və planların yerinə yetirilməsi prosesini izləmək olub. Görüş iştirakçıları müxtəlif sahələr üzrə əməkdaşlığın daha da genişləndirilməsi üçün müzakirələr aparıblar.
Axın.az
